img

Wajawazito wapatiwa ahueni ya maji hospitali ya Kibena mkoani Njombe

December 9, 2020

Na Amiri Kilagalila,Njombe

Uhaba wa maji safi na miundo mbinu ya maji taka iliyokuwa kikwazo kwa wajawazito na watoto katika hospitali ya halmashauri ya mji Njombe (Kibena) imepatiwa ufumbuzi baada ya kukamilika kwa mradi wa ujenzi wa tenki la maji katika hospitali hiyo uliogharimu zaidi ya shilingi milioni 164.

Hayo yamesemwa na katibu tawala wa mkoa wa Njombe Catalina Revocat kwenye makabidhiano ya mradi huo wa tenki la maji lililojengwa katika hospitali hiyo hafla iliyofanyika katika viwanja vya hospitali hapa mkoani Njombe.

Catalina amesema upatikanaji wa maji safi katika hospitali hiyo ya halmashauri ya mji awali ulikuwa duni kiasi cha kutishia afya ya wajawazito na watoto  hospitalini hapo.

Amesema suala la usafi na afya katika hospitali kwa ujumla inategemea uwepo wa maji safi na utunzaji wa maji taka ambayo kama hayajashughulikiwa vizuri afya za wagonjwa zinakuwa hatarini.

Amepongeza shirika la kuhudumia watoto duniani (UNICEF) na shirika la maendeleo ya watu(PDF) kwa ujenzi wa tenki hilo la maji kwani kufanya hivyo wameisaidia serikali katika kuhakikisha huduma za hospitali kwa mama wajawazito na watoto zinakuwa nzuri

“Hospitali hii ilijengwa muda mrefu tangu mwaka 1952 wakati huo ilikuwa ikihudumia wagonjwa wachache lakini mji umekuwa na watu wameongezeka hivyo ilikuwa imezidiwa” Alisema Catalina.

“Serikali imejitahidi kujenga miundo mbinu mingi lakini suala la maji na maji taka mmekuja kutusaidia kuongeza nguvu katika juhudi zinazofanyika na serikali” Alisema Catalina.

Awali akisoma ripoti ya utekelezaji wa mradi huo mhandisi wa mradi kutoka PDF mhandisi Elias Muchunguzi alisema mradi huo ulianza mwaka jana mwezi januari na kukamilika mwaka huu ambapo mradi huo umelenga kunufaisha watu wapatao 532.

Alisema kwa upande wa wodi za wazazi ambayo ndiyo kipaumbele cha mradi huo utawanufaisha wajawazito 85 kwa siku katika wodi tatu za wazazi zilizopo kwenye hospitali hiyo.

Aliongeza kuwa wanufaika wengine wa mradi huo ni wagonjwa waliopo katika wodi zingine ambazo si za wazazi pamoja na wafanyakazi wa hospitali hiyo ambao ni zaidi ya 187.

” Jumla ya gharama ya mradi ni shilingi 160, 916,212 hiyo ni kwa upande wa mfadhili lakini kwa halmashauri imechangia kiasi cha shilingi milioni nne na kufanya mradi huo kukamilika kwa zaidi ya kiasi cha shilingi milioni 164″ Alisema Muchunguzi.

Pamela Shao ni mkuu wa ofisi ya UNICEF nyanda ya juu kusini ambao ni wafadhili wa mradi huo amesema anaamini maboresho hay ohayo kwa ajili ya huduma ya mama na mtoto yametatuliwa kwa kuwa huwezi kutoa huduma ya afya bila maji safi na salama.

“Nadhani kwa mradi huu ile adha ya zamani kuhusu maji hasa ukifika wodini sasa hivi imeshatatuliwa na tunajua katika kutoa huduma za afya huwezi kutoa bila ya kuwa na maji safi na salama”alisema Pamela Shao

Naye mganga mkuu wa halmashauri ya mji wa Njombe Dkt,Issaya Mwasubila kwa niaba ya mkurugenzi wa halmashauri ya mji ameahidi kulinda na kuitunza miundombinu hiyo ili iendelee kuwasaidia watumishi na wagonjwa hususani watoto na akina mama.

,

Article Categories:
Uncategorized

Leave a Reply

Your email address will not be published. Required fields are marked *